د ا.ا.ا د ټولګټو وزارت د اوسپنې پټلۍ مرستیال د یو پلاوي په مشرۍ د ریلي همکاریو د پراختیا په موخه ایران ته سفر کړی دی
د ا.ا.ا، د ټولګټو وزارت د اوسپنې پټلۍ مرستیال، محترم الحاج مولوي محمد اسحاق صاحبزاده په مشرۍ یوه لوړپوړي پلاوي، چې د کانونو او پټرولیم وزارت د برنامو او پالیسۍ مرستیال محترم مولوي عبدالرحمن قانت او یو شمېر تخنیکي مسئولینو یې ملتیا کوله، ایران هېواد ته سفړ کړی او د دواړو هېوادنو استازو د زیربنایی پروژو، اوسپنې پټلۍ پروژو او نويو مسیرونو په اړه خبرې اترې کړې دي.
په یاده غونډه کې د دواړو هېوادونو ترمنځ د هرات – مزارشریف د ۶۵۷ کیلومتره اوسپنې پټلۍ پروژې د جوړولو، تخنیکي مشخصاتو او معیارونو، د پروژې د پړاوونو، د مالي تمویل د جوړښت، لګښتونو، او د افغاني او ایراني شرکتونو د ګډون د څرنګوالي په اړه بحث او صورت جلسه لاسلیک شوه.
په دغه ناسته کې د غونډې ګډونوالو د افغانستان او ایران ترمنځ د اوسپنې پټلۍ او ترانسپورتي همکاریو د لا پراختیا پر اهمیت ټینګار وکړ او څرګنده یې کړه، چې د ګډو پروژو د پرمختګ، تخنیکي همغږۍ او د یادې موضوع د تعقیب په موخه به په راتلونکي کې هم ورته تخنیکي او تخصصي ناستې دوام ولري.
د یاودنې وړ ده د هرات – مزارشریف اوسپنې پټلۍ د افغانستان لپاره یو ډېر مهم اقتصادي دهلېز ګڼل کېږي، چې نه یوازې شمالي ولایتونه له یو بل سره نښلوي، بلکې ایران او ترکیه د افغانستان له لارې د منځنۍ آسیا هېوادونو او بیا تر چین پورې سره نښلوي.
دا پروژه یوازې د سیمهییز اتصال له پلوه اهمیت نه لري، بلکې د هغې په بشپړېدو سره به افغانستان میلیاردونه افغانۍ د ترانزیت عواید ترلاسه کړي، چې د هېواد په خودکفایۍ او اقتصادي ودې کې به حیاتي رول ولوبوي.
د ا.ا.ا د ټولګټو وزارت هڅه کوي، چې د یادې پروژې د عملي کولو لپاره اړین مالي لګښتونه له بېلابېلو کورنیو او بهرنیو سرچینو څخه برابر، جلب او تمویل کړي.
