په دایکندي ولایت کې د نیلي – اشترلي سړک د ترمیم او جغل اچونې پروژه پیل شوه
په دایکندي ولایت کې د اشترلي ولسوالۍ د سړک د ترمیم، پراخولو او جغل اچونې پروژه د ۶ میلیونه او ۶۹۹ زره افغانیو په ارزښت د ا.ا.ا د ټولګټو وزارت او خصوصي سکتور ترمنځ قرارداد او د دایکندي ولایت د ټولګټو رئیس محترم الحاج مولوي اکرامالله عبدالرافع، سیمه ییزو مسؤلینو او قومي مخورو په شتون کې رسماً پیل شوه.
دغه سړک د دهن قوچنقي سیمې څخه پیلېږي او د اشترلي ولسوالۍ د بند مازار تر سیمې پورې غځېږي، چې ۵ کیلومتره اوږدوالی لري او اشترلي ولسوالۍ د ولایت له مرکز سره نښلوي. د دې پروژې چارې به د ۵ میاشتو په موده کې بشپړې او ګټې اخیستنې ته وسپارل شي.
د دغه سړک د چارو په بشپړېدو سره به د خلکو د تګ راتګ ستونزې هوارې شي او همدارنګه روغتیايي خدمتونو، ښوونیزو مرکزونو او بازارونو ته د خلکو د لاسرسي او د کرنیزو محصولاتو د اسانه لېږد زمینه به هم برابره شي.
د ا.ا.ا د ټولګټو وزارت هڅه کوي، چې د ترمیماتي پروژو په تطبیق سره هېوادوالو ته د اسانه او خوندي تګ راتګ زمینه برابره کړي.
