د ټولګټو وزارت دری تنه نوي رئیسان دندو ته ور وپیژندل شول
د ا.ا.ا، د ټولګټو وزارت د رهبرۍ له لزوم دید سره سم محترم انجنیر عامر یاسر د پروژو د کنترول او کیفیت سرپرست رئیس، محترم مفتي هارون رشید د ادارې او خدماتو سرپرست رئیس، مولوي حمیدالله مصباح د اطلاعاتو او عامه اړیکو د رئیس په توګه په داسې حال کې معرفي او په کار پیل وکړ چې د دې وزارت مرستیالانو او یو شمیر رئیسانو هم حضور درلود.
د یادو رئیسانو په معرفي غونډه کې د ټولګټو وزارت تخنیکي مرستیال محترم سید ادریس میر او د دې وزارت مالي او ادارې مرستیال محترم ملا بخت الرحمن شرافت، خبرې وکړې ویې ویل؛ په دنده کې تغیر او تبدیل د ښې حکومتوالي اصل دی، همدارنګه یې له نوي رئیسانو څخه وغوښتل تر څو په ټول توان سره ورسپارل شوي مسؤولیتونه په ښه توګه ترسره کړي او د هیواد د آبادي لپاره هڅه وکړي.
ورسته نوي ټاکل شویو رﺉیسانو په خپل وار سره خبرې وکړې، د ټولګټو وزارت د رهبرۍ له باور څخه یې مننه وکړه او ژمنه يې وکړه چې ورسپارل شوي دندې به په غوره توګه ترسره کړي او د ادارې د ښه والي لپاره به هڅې ګړندۍ کړي.
همدارنګه په دې مراسمو کې د ټولګټو وزارت رهبري د یادو ریاستونو مخکني رئیسانو له کړنو څخه مننه وکړه او د نورو بریاوو هیله یې ورته وکړه.
د ټولګټو وزارت رسنیز دفتر