د ټولګټو وزارت سرپرست وزیر د کابل - کندهار لويې لارې له کاري بهير څخه له نږدې ليدنه وکړه
د ټولګټو وزارت سرپرست وزیر محترم الحاج ملا محمد عیسی ثاني، چې یو تخنيکي ټيم يې ملتيا کوله؛ کندهار ولايت ته د خپل کاري سفر په ترڅ کې د کابل - کندهار لويې لارې د بېلابېلو برخو له کاري بهير څخه له نږدې ليدنه وکړه.
د ټولګټو وزارت سرپرست وزیر په ياد سفر کې چې د زابل ولايت د ټولګټو رئیس محترم مولوي احمد احمدي هم ورسره ملتیا کوله، د کابل - کندهار لويې لارې اړوند د زابل ولايت د يو شمېر تر کار لاندې پلونو (سنګر مانده، خارجوی، غشي منار دوهم پل او سوخته پل) څخه د ليدنې تر څنګ د خار جوی پل پرانیست او ګټې اخيستنې ته وسپارل شو او قرار دادي شرکتونو ته یې سپارښتنه وکړه چې د پاتې نورو پُلونو کار هم د سړې هوا تر را رسیدو مخکې بشپړ کړي.
دغه راز د یاد ولایت اړوند د قلات – مقر د ۱۱۲ کیلومتره سړک کار هم جریان لري چې د ټولګټو وزارت سرپرست یې له کاري بهیر څخه د لیدنې ترڅنګ د یادې پروژې له کرش پلانټ او کانکريټ پلانټ څخه هم لیدنه وکړه او د پروژې د تطبیق کونکي ټیم ترسره شوي کارونه یې وستایل او د یادې پروژې مسؤلینو ته یې سپارښتنه وکړه ترڅو د دغې پروژې کار د سړې هوا تر رارسیدو مخکې د زاړه نورک پُل، سیمې پورې تکمیل کړي.
د ټولګټو وزارت سرپرست دغه راز د شينکۍ ولسوالۍ له پله څخه هم ليدنه وکړه او تطبیق کوونکو مسؤلینو ته يې لار ښوونه وکړه چې د ياد پله؛ پايې او استنادي دېوالونه په چټکۍ سره ورغوي او د پله د کانکریټ اچونې کار چې سړه هوا یې د کار په کیفیت منفي اغېزه کوي د راتلونکي کال په پسرلي کې ترسره کړي.
د يادونې وړ ده چې د دغو پروژو د کار په جریان کې په سلګونه هېواد والو ته د کار زمینه برابره شوې ده او په تطبيق سره به یې د خلکو ترانسپورتي ستونزې دپخوا په پرتله هوارې شي او خلک به په اسانۍ سره تګ راتګ وکړي.
