سمنګان: د دره صوف – شباشک کان سړک رغنیزې چارې په چټکۍ سره روانې دي
د دره صوف – شباشک کان سړک ۳۷.۱۹۴ کیلومتره اوږدوالی او ۱۰ متره پلنوالی لري چې د سمنګان ولایت له دره صوف بالا ولسوالۍ څخه پیل تر شباشک کان پورې غځیږي.
د دې سړک په اوږدو کې، دوې پایې ۸۰ متري پلونه، ۱۱۲ پُلګوټي او د ۶۴۰۰ مترو په اوږدوالی سره ۵۶ اوبتېرونه ( واشونه) هم شامل دي چې دا مهال یې د رغونې چارې ګړندۍ روانې دي.
یاده پروژه د ټولګټو وزارت او یوه خصوصي ودانیز شرکت ترمنځ تړون شوي چې مالي لګښت یې د هیواد له پراختیايي بودیجې څخه ورکول کیږي.
د سړک دغې پروژې نه یواځې د سیمې اوسېدونکو ته ګڼ کاري فرصتونه رامنځته کړي، بلکې د چارو له بشپړېدو سره به یې د دره صوف ولسوالۍ د ډبرو د سکرو په لېږد کې هم ډېره مرسته وکړي.
