د حيرتان – مزار شریف د بهره بردارۍ او حفظ و مراقبت تړون د دوو کلونو لپاره وغځول شو
د ا.ا.ا د ټولګټو وزارت د اوسپنې پټلۍ مرستيال محترم مولوي محمد اسحاق صاحبزاده او مل پلاوي اوزبيکستان هيواد ته د سفر پرمهال د حيرتان بندر د بهره بردارۍ او حفظ و مراقبت تړون د تمديد او د ياد بندر د ريلي ترميماتو تړون د غځولو په تړاو هوکړه وکړه.
ددغه سفر په جريان کې د ټولګټو وزارت د اوسپنې پټلۍ د مرستيال او د اوزبيکستان هيواد د سوګديانا ټرانس کمپنۍ د رئيس محترم جمشيد آقا ترمنځ د حيرتان بندر اړوند د بهره بردارۍ او حفظ و مراقبت چارو د غځولو تړون د ۲۰۲۵ او ۲۰۲۶ کال لپاره وغځول شو.
په ياد سفر کې د افغانستان د اوسپنې پټلۍ د مرستيال او اوزبيکستان هيواد د اوسپنې پټلۍ د رئيس ترمنځ د افغان-ټرانس پروژې د امکان سنجۍ د (Feasibility Study) د پیل او د مزارشريف-هرات اوسپنې پټلۍ د سروې او ډيزاين چارو په مخ ته ورلو موافقه وشوه.
دغه راز په ياد سفر کې د حيرتان د ريلي ترميماتو پروژې غځولو په تړاو د ټولګټو وزارت د اوسپنې پټلۍ د مرستيال او اوزبيکستان هيواد د اوسپنې پټلۍ ادارې ترمنځ يوه صورت جلسه هم لاسليک شوه.
دا په داسې حال کې ده، چې په دغه سفر کې د افغانستان، اوزبيکستان او پاکستان هيوادونو ترمنځ د افغان-ټرانس پروژې د عملي چارو د پيل کېدو په تړاو هم خبرې اترې کړي دي، چې اوزبيکستان هيواد د افغان-ټرانس پروژې د امکان سنجۍ (Feasibility Study) چارو مالي تمويل په غاړه اخيستی او په نږدې راتلونکې کې به يې چارې پيل شي.
د يادونې وړ ده، چې اوسمهال د مزارشريف-هرات د اوسپنې پټلۍ مسير د سروې او ډيزاين چارې هم د اوزبيکستان هيواد لخوا عملاً جريان لري.
